აკაკი წერეთელი - სცენიდან ნათქვამი

პოეტების ბედის ვარსკვლავს

ქვეყნად ვერრა შეედრება:

მათს სიკეთე-დღეგრძელობას

სუყველა ღმერთს ევედრება.

არავის ჰყავს ქვეყანაზე

მათოდენა მეგობარი!

ყველას უნდა მათი ნახვა -

უყვართ მათი საუბარი.

ჭირში, ლხინში, სუყოველგან,

მზად არიან მისცენ მხარი!

"ვაშა-ვაშას" შესძახიან

და მხარს აძლევს მთა და ბარი.

ქვეყნის მათზე გულუხვობა

დიდია და საოცარი:

ცოცხალს ტაში! მკვდარს - გვირგვინი,

აი, მათი საჩუქარი...

პოეტების ბედის ვარსკვლავს

ვერაფერი შეედრება!..

და მიკვირს, რომ პოეტობა

სუყველას არ ენატრება?!..