აკაკი წერეთელი - ნინოობა

ცაში ვარსკვლავი ვარსკვლავზე

ღვთისაგან დანათესია,

მაგრამ ამათში ყველაზე

შუქურა უკეთესია!..

ბევრია ჩვენში დღეს ნინო

პირთა-მზე, მზეთუნახავი,

მაგრამ იმ ნინოს მსგავსის კი

არავისი ვარ მნახავი.

ის სულ სხვა იყო!.. სულითაც

იგივე მშვენიერება!..

მკურნალი ივერიისა, -

საერო ბედნიერება.

მას არ ჰქონია საუნჯე

დაუდებელი ფასისა,

სიმდიდრედ ხელში ეჭირა

უბრალო ჯვარი ვაზისა.

და ის მოგვიძღვნა ქართველებს

საშვილიშვილო სიმდიდრედ,

ჩვენც სჯული და ეროვნება

ორივე მაზედ ვამკვიდრეთ!

მისის ცრემლებით ნაბანი,

შეკრული იმისივე თმით:

სურვილით გამაგრებული,

განმტკიცებული გულის თქმით.