აკაკი წერეთელი - მიმკვლევა (გამხიარულდი ბუხარო!)

გამხიარულდი ბუხარო!

გულ-ჩახვეული ნუ ხარო!..

მცივანა ზამთარს უყვარხარ

და არც ცხელ ზაფხულს სძულხარო!

მოვდივართ მოსალოცავად,

მოგვაქვს სამკვლევი და "კვალი";

ღმერთმა მრავალ წელს დაგასწროთ

და გაგითენოთ ახალი!

შენ აგუზგუზებ ბუხარო, 

დაბლა ნაკვერჩხალს, მაღლა ალს...

მუგუზალს შეგიჩინჩხალებთ,

გაგაყრევინებთ ნაპერწკალს.

და ლოცვა-ნატვრას დავიწყებთ...

ეს ძველებური წესია:

ის ერთი ასად მოიმკოს,

რაც კარგი დაგითესია!..

ამდენი პური და ღვინო!..

ხორაგეული ამდენი!..

ამდენი ჯოგი ოთხ-ფეხი:

ცხვრები, ძროხები და ცხენი.

ამდენი ოქრო და ვერცხლი!

თვალ-მარგალიტი ამდენი!

სიკეთე ბევრი, სხვადასხვა

და ღმერთი მხოლოდ ამხდენი!!

ამ ძველებურსა ნატვრასა

ჩვენც დავამატებთ ახალსა:

ამდენი თანამგრძნობელი

და წამკითხველი ჩვენს "კვალსა".

გამხიარულდი, ბუხარო,

დაფიქრებული ნუ ხარო.

ჩვენს მოყვრებს ყველას უყვარხარ!..

მტრებს ხომ სძულხარ და სძულხარო!