აკაკი წერეთელი - ალბომში

ყმაწვილი სჯობდი მოხუცსა,

მოხუცდი - სჯობხარ ყმაწვილებს?

ისეა, ვისაც ბუნება 

თვის ძალას გაუნაწილებს.

ახალი ცუდი ძველ კარგის

ვისგან რა შესაფარდია?

ვარდი რომ კიდეც სჭკნებოდეს,

მაინც ვარდი და ვარდია.

ის თუმც აღარ ხარ, რაც იყავ,

შენთანვე შედარებითა,

მაინც შენ გირჩევს გონება

და გრძნობა-ნეტარებითა.

იცოცხლე, იმხიარულე,

ციურის ნიჭით გზნობილო!

არ მინდა დაგასახელო

ისეც ყველასგან ცნობილო!