აკაკი წერეთელი - ყარიბი

ნუ კითხულობ, ვინა ვარ?

სიდან მოვალ? სად მივალ?

სულ ესა ვარ, რაცა ვარ,

რასაც მხედავთ თვალ-და-თვალ!

თავისუფლად დავდივარ,

არც ბატონად, არც მონად!

ცა ქუდად არა მყოფნის,

დედამიწა ქალამნად!

უფროსი, არც უმცროსი

ნებით არვინ მყოლია!

ვინც მიცნობს და ვისაც ვსცნობ,

ყველა ჩემი ტოლია!?

ძმობა და სიყვარული

ფულით არ მიყიდია!..

მხოლოდ გული და სული

მათი გზა და ხიდია!

არც მქონია, არც რამ მაქვს,

არც მექნება, მგონია,

მაგრამ ჩემზე მდიდარი

არც კი გამიგონია!

მე რომ მაქვს ის სიმდიდრე

ღვთისგან მოცემულია:

სულია ის საუნჯე

და სიმდიდრე გულია!

ვერ მომპარავს ვერავინ

თან დამაქვს ეს დიდება!..

განჩინების ძალითაც

ხელი არ ეკიდება.

ჩემოდექი პრისტავო!..

ნუ მოდიხარ, მოვალე!..

სიმდიდრეც ამას ჰქვიან...

ვინც მომცა... ვენაცვალე!..