აკაკი წერეთელი - სიყვარული (ყველამ ვიცით სიყვარული)

ყველამ ვიცით სიყვარული,

ყველასა გვაქვს გამოცდილი,

მას შემდეგ, რომ ევამ ადამს

შეაპარა უცხო ხილი...

იმავ დღიდან აქამომდე

უკუღმართად გვიცემს გული:

რაც ჩვენია, მოგვწყენია,

გვენატრება აკრძალული.

და მიტომაც კაცს ყოველთვის,

მზეთუნახავ ცოლის პატრონს,

გინდ მახინჯი რამეც იყოს,

სხვისი ცოლი უფრო მოსწონს!..

და ქალებმაც, მაშ, რაღა ჰქნან,

რომ ქმარს თავი შეაყვარონ,

თუ იმათაც წრფელი გულით

სხვის ცოლობა არ ინატრონ?!.