ნანა ცინცაძე - ნუ შეგშურდებათ

ნუ შეგშურდებათ თვრამეტი წელი,

თუკი გეწვიათ უცებ შუადღე.

თქვენს სიბერემდეც მზერაა მწველი,

კარს სიყვარული ისევ თუ აღებს.

აცადეთ ბავშვებს იყვნენ თავისთვის,

მძლავრად ისუნთქონ ჰაერი სუფთა

და უცოდველი სიყვარულისთვის

ჩამოარიგონ კოცნები მუქთა.

არ დაუშალოთ გიჟური როკვა,

ღიმილის ნაცვლად მხოლოდ ხარხარი,

თორემ ვისთვისაც ზამთარი მოვა,

ჩასაფრებული ურცხვად აქ არი.

მათ ახლა უნდათ ლექსთა კრებული,

შენც ხომ ხვდებოდი ასე განთიადს...

მზე, მათი ხიბლით გაბრწყინებული,

თავისუფლების ჰიმნად ანთია.