ლელა ცუცქირიძე - წმინდა ნინო

ჯვარი, როგორც ჩიხტიკოპი,

ხურავს მცხეთას,

მოდის მტკვარი, კი არ მოდის,

მორონინობს,

მაყვლოვანში ენას იდგამს ჩიტის ბარტყი:

ნინო,

ნინო...

მე ვინ ვარ და... მე - არავინ,

არაფერი...

შემეწიე, რომ ჩიტივით

გულმა გიგრძნოს,

მარცვალ-მარცვალ გაბნეული სინანული

მაპოვნინო...

დგას სამთავრო, იით ეზოდანისლული,

კვირტებს, როგორც ზანზალაკებს

არხევს სიო,

მაყვლოვანში ერთი ბეწო გალობს ჩიტი:

ნი-ნო,

ნი-ნო...