სილაზე იწვა ქალი და კვალი, ცოცხალი კვალი ქალიდან ზღვამდე. ყველაფრის ნებას აძლევდნენ თვალებს მეზღვაურები, რომლებიც სვამდნენ.
და ბინდში კრთოდა თეთრი ქალაქი გაბრუებული ქაფურის სუნით და თევზის სუნით და ლაპარაკით.
შეჩვეულები ყოველგვარ ავდარს, და სველი კვალი ქალიდან ზღვამდე, ოცნებებს, სიზმრებს და ზღაპრებს ჰგავდა,
და საბოლოოდ ქრებოდნენ ცაში, ქრებოდნენ სხვა დროს და არა ახლა, ახლა არავის არ სურდა ცაში.
და ერთდროულად ყველა ჩემობდა. და მიმავალი გემების ბოლიც უბრუნდებოდა ქალაქს ზემოდან.
და ბინდში კრთოდა თეთრი ქალაქი გაბრუებული ქაფურის სუნით და თევზის სუნით და ლაპარაკით. |
პოეზიის გვერდი • • • • • • ოთარ ჭილაძის პოეზია |