ოთარ ჭილაძე - შექსპირი

ფრთხილად! ცხოვრება იწყება ასე

აჰა, დაიწყო და დღეის იქით,

სისხლით და ცრემლით გაჟღენთილ გზაზე,

შენს წაქცევასაც ეცდება იგი.

ფრთხილად! სუსტია ადამიანი,

მალე ერევა შური და ღვარძლი

და არ დაგითმობს მაინც მთლიანად

შენთვის განკუთვნილ დროსა და მანძილს.

ფრთხილად! დამალე შიშიც და ზიზღიც

და გატრიალდი... ან რაღას უცდი,

თუკი არ გინდა, რომ კაცის სისხლზე

დაგისხლტეს ფეხი, ჯერ კიდევ სუსტი.

ხედავ? სინათლე ძლივსღა ციმციმებს,

ხოლო ვეება ლანდი იუდას

აწვება ქალაქს რკინის სიმძიმით,

რკინის სიცივით და სიჯიუტით.