რეზო ამაშუკელი - ჩემს სახლთან პატარა ბაღია

ჩემს სახლთან პატარა ბაღია

მაღალი ხეებით, ჩრდილებით,

მოდიან ლამაზი დედები,

ძალიან ლამაზი შვილებით!..

ჩემს სახლთან პატარა ბაღია

მყუდრო და სათუთი ჩრდილებით,

აქ ყოველ საღამოს მოდიან:

ვაჟები, ქალები, წყვილები...

წვიმაა, ცამ ცრემლი მათოვა,

ვსველდები, თანდათან ვსველდები,

აქ ახლა არავინ არ მოვა

წყვილები, ბავშვები, დედები..

ფოთლებში ნათურას დავეძებ

ანთებულს მოწყენილ ფიქრითა,

აქ ერთი გოგონა რამდენჯერ

მიცდიდა... მიცდიდა... მიცდიდა...

ვკოცნიდი, თვალებში ვკოცნიდი,

მკოცნიდა, თვალებში მკოცნიდა,

და ბოლოს დავტოვე, მოვცილდი...

თვითონაც წავიდა, მომცილდა..

წვეთები, წვეთები, წვეთები,

ჩემს სახლთან პატარა ბაღია...

პოეზიის გვერდი   • • •     • • •   რეზო ამაშუკელის პოეზია