აკაკი წერეთელი - ტყუილ მგოსანს

არ მინდა შენი "ნანინა"

და შენი ძილის პირები!..

მე დამაძინო ის გინდა

და შენ კი ლხინს ეპირები?

შენ დაღამებას მექადი

მე ველი გათენებასა...

გსურს შენს კილოზე ვიმღერო

გადავჰყვე შენსა ნებასა?

არ მოხერხდება... ვერ დავსთმობ

მე ჩემებურსა მღერასა,

სანამ ყურს ვუგდებ სიამით

მოძმეთა გულის ძგერასა.

შენი "ნანინა" შენ გქონდეს...

ეგ შენი მოსაწონია...

წადი სიდანაც მოსულხარ,

მშვიდობის გზაცა გქონია.