კოლაუ ნადირაძე - პირველი მარტი

პირველი მარტი! (მოვიგონოთ მთვარე ნაკლული),

ცოტათი გვასწრებს კალენდარი ახალი სტილით.

ყველას გაგვწვდება დღეს ქალაქში ხორცი დაკლული:

ყველა ვიშოვით სანოვაგეს სულ ახალს დილით.

თეთრი ტყემლების აყვავებას ბევრი უცდიდა;

ახ, მეც ვეცდები, დავალაგო ჩემი ცხოვრება!

იქნება მერგოს სიხარულის მეც ერთი ციდა;

ო, ეს წყალობა მე ყოველთვის მემახსოვრება.

წრეულს ზამთართან მეგობრულად ვერ გავატარე;

ცივი ალერსით თითქოს მთვარეც აღარ მწყალობდა;

ყველა მაყვედრებს, რომ მამაჩემს ვერ დავედარე

და უდედობით ორი შვილი ჩემი დაობლდა.

დაბრუციანდა ჩემი ძაღლიც - მტრის გასახარად;

სისხლიან თვალით მოფერებას ის მევედრება:

მადლობა ყველას, უსათუოთ, გულწრფელი მარად!

ბედნიერებით ჩვენ ვერავინ ვერ შეგვედრება.