თამაზ მეტრეველი - გადაიყარე ღრუბელო...

გადაიყარე ღრუბელო,

ნუ მითვალთვალებ ზეციდან...

შავი ცხენი ვარ უბელო

მოვფრინავ ქარაფებიდან...

კაფავს და კაფავს სიკვდილი

ჩემს ძარღვ-ხორცსა და ჯილაგებს...

სისხლიანი აქვს ცხვირპირი

როგორც მტევნები პილატეს...

გავიდნენ, დღენი გავიდნენ,

ოთხი მხრივ ხმლების ქნევისა...

რა სწრაფად ჩამოარიგე

ეს აკლდამები ძვლებისა...

კლდეს მივდევ ფეხი დამისხლტა

თუ ნაპრალს სალი ქვა მოწყდა?..

დაიმსხვრა ბეჭი ხარისა,

ირგვლივ წყვდიადი ჩამოწვა...