ვახტანგ ჯავახაძე - ტელეფონების წიგნაკში

ტელეფონების წიგნაკში მიჭირს გვარების გადაშლა,

ვით მავანთან და მავანთან - გულის გახსნა და გადაშლა,

რომლებსაც სიცოცხლეშივე სიამოვნებით გადავშლი,

რომ ისევ არ შემიტყუონ მოშაირეთა ღადავში.

მე უნდა გადავამოწმო ანბანთა იერარხია,

რომელიც მეხსირების სასაფლაოზე მარხია.

რაც უნდა გაწონასწორდეს წლების და წლების ბალანსი,

არ იწურება ლიმიტი - დარდის და დარდუბალასი.

რაც უნდა მოვილხინო და რაც უნდა წავიგურმანო,

ხელი არ მემორჩილება, არც - გული, ჩემო მურმანო:

აბასთუმნის ტყეები,

ხუდადოვის ხედები -

ანტისამოთხეები

ანუ ჯოჯოხეთები:

დანომრილი ხეების

და დათვლილი დღეების

ტყეში მივეხეტები.