ვახტანგ ჯავახაძე - ოქროს თევზი

თევზი მაინც გაუშვი, გინდა არ იყოს ოქროსი,

თუ ოქროსი იქნება, მითუმეტეს გაუშვი,

მადლი მოგიბრუნდება კეთილ სამეგობროში,

თავისთავად მოგნახავს ქვეყნის აურზაურში.

დალაგდება ცხოვრება: მოვლენ უკეთესები,

უღალატო დღეები შეცვლის ღალატიანებს,

დღეს რაც ცოდვა ტრიალებს: დაჭერილი თევზების,

დახოცილი თევზების ცოდვა-ბრალიც ტრიალებს.

მაინც სადღაც იმედის სხივი გაიციმციმებს

და, როდესაც გათიშავს უცნობებს და ნაცნობებს,

ჩადენილი ცოდვების სიმძიმეს და სიმძიმილს -

გაშვებული თევზების მადლი აწონასწორებს.