ვახტანგ ჯავახაძე - მეტ ხესა და მემკვიდრეს...

მეტ ხესა და მემკვიდრეს ანკი როგორ გავზრდიდი:

მე ამ წუთისოფელში გავლითა ვარ, ტრანზიტით.

ხელს ამაოდ მიქნევენ დიდი მაესტროები: 

- სად მცალია: ამქვეყნად გავლითა ვარ, დროებით.

როგორ გავყვე სოფლისკენ სუროებს და ხვიარებს:

რას მოვასწრებ: გზადა ვარ, ისე შემოვიარე.

მეღიმება, ღიმილი აღმართს გამიადვილებს,

ვესალმები გზადაგზა სოსოიას ქართველებს.

დავესიზმრეთ ერთმანეთს და სიზმრების კასეტა

ჩამოთავდა, გავდივარ ისევ შარაგზაზე და...

ისევ და ისევ მგზავრი ვარ, თანამგზავრი ვარ ბებერი -

პოეტის მოვალეობის დროებით შემსრულებელი.