ტარიელ ხარხელაური - ხმლის ნატეხს კბილით ლესავდე...

ხმლის ნატეხს კბილით ლესავდე,

სჭამდე, ვერ გასძღე, გშიოდეს,

წყალთან იდგე და ვერ სვამდე,

გკაფავდენ, არა გტკიოდეს.

დაგმეხონ, ალი აგვარდეს.

გული გველივით წიოდეს.

სისხლის მაგივრად შუბლიდან

შხამ-გესლი ჩამოგდიოდეს.

ცრემლი გდიოდეს, დაგიშრეს,

თვალებში ცეცხლი ღვიოდეს.

ომში შეხვიდე, არ მოკვდე,

ვერც მთელი გამოდიოდე.

შეირხე - ყვავილთა ნაცვლად

ქვა-ღორღი ჩამოგდიოდეს.

ინაცრებოდე, ვერ გასთბე,

სკდებოდე გვამში გციოდეს.

თუ არ მამულის ტკივილი -

მამულს!

შენ არა გტკიოდეს!