ტარიელ ხარხელაური - ერეკლე საღლიანს

მე რომ ჯავრი მგლეჯს და მე რომ

ჯავრი მფლეთავს,

შენ რომ გაკვნესებს და შენ რომ

გაღრიალებს,

არც სხვები არიან ჩვენზე უკეთესად,

სტკივათ საქართველო -

ერეკლე საღლიანო!

ახლა სამშობლოსთვის უნდა მოვიცალოთ,

საკმარი დავთმეთ და საკმარი ვიგლოვეთ,

ჟამია ერეკლე სისხლით მოიცვაროს,

სამშობლოს ახალი სჭირდება დიდგორი.

ჩვენ გუშინ ვიხილეთ, რა იყო კრწანისი,

ხმამაღლა ვკითხულობ -

ხომ არ ვაგვიანებთ?

დღეს უნდა შევძახოთ სამშობლოს -

ხვალისთვის,

დღეს უნდა შევძახოთ, ჩემო საღლიანო!

ხომ ვხედავთ, მამული ხელებში გვადნება,

რაც მტერმა ვერ გვიყო, მოკეთე გვიშვრება,

როდემდის ვიხადოთ ლუკმისთვის მადლობა,

როდემდის ვუთმინოთ ჩვენს გადაჯიშებას.

ახლაც ღრუბელივით ცაზე დავფარფატებ,

ზეცისკენ გამირბის მზერა ნაღვლიანი,

რაღაა მამული - ჩემს ერთ ცრემლში დავტევ,

შენს წვეთ სისხლში დავტევ

ერეკლე საღლიანო!