ვახტანგ ჯავახაძე - ჩემი ლექსის მთარგმნელებს

ჩემო მოამაგენო, თუ გსურთ, რიტმი შეცვალეთ,

თუ გსურთ, მეტრიც შეცვალეთ მეორედ და მესამედ.

თუ გსურთ, გაამარტივეთ შედგენილი რითმებიც,

ალიტერაციებსაც ნუღარ მოერიდებით.

თუ დაგჭირდეთ, დააწყვეთ სტრიქონები თავიდან,

მეტაფორაც გაშიფრეთ, არა უშავს, აიტანს.

ნუ მიბაძავთ სინტაქსურ მსგავსებებს და შეხვედრებს,

შედარებით იოლად შედარებებს შეხედეთ.

ქვეტექსტსა და ქარაგმას ნუ გაუწევთ ანგარიშს,

ნუ დაიცავთ ყოველი ინვერსიის მაგალითს.

ნუ დაძებნით შესატყვის ჟარგონსა და ეპითეტს,

ზუსტი ინტონაციის შერჩევასაც ერიდეთ.

ნუ გამოედევნებით აქცენტსა და პაუზას,

შეგიძლიათ, ზოგ რეფრენს ხაზი არც კი გაუსვათ.

შეგიძლიათ, ხანდახან, ჰიპერბოლაც გაწიროთ,

ყველა ქვესათაური არ იქნება საჭირო.

გამოტოვეთ გზადაგზა ზუსტი ზედსართავები,

გამოტოვეთ სტროფი და გამოტოვეთ ტაეპი.

გამოტოვეთ ორმოცჯერ, გამოტოვეთ სამოცჯერ...

ოღონდ ჩემი გვარი და სახელი არ გამოგრჩეთ!