ვახტანგ ჯავახაძე - თორმეტსა და თოთხმეტს შორის

თორმეტსა და თოთხმეტს შორის,

თოთხმეტსა და თორმეტს შორის -

ბეწვის ხიდზე გაგვატარებს უხილავი რეჟისორი,

ყველა ხარვეზს გაგვისწორებს უჩინარი რეტუშორი

და ერთბაშად მოგვეხსნება ყოველგვარი ფორსმაჟორი.

თორმეტსა და თოთხმეტს შორის,

თოთხმეტსა და თორმეტს შორის -

სინამდვილეს დაგვავიწყებს ინკოგნიტო დირიჟორი,

აგრემც დროზე დაისჯება აგრესორზე აგრესორი

და კრიმინალს აღმოაჩენს რევიზორთა რევიზორი.

არის გზები ფულის შოვნის, არის ბილიკები შოვის

და ბიჭვინთის რია-რიაც გამახსენდა, სხვათაშორის.

რია-რია-რიასა და ტია-ტია-ტიას შორის -

შრიალია შარიშურის და წყვდიადი შავი შურის.

რია-იბერიასა და რია-არტარეას შორის -

ბევრი არხი გაიყიდა, ბევრი ტელე და ვიზორი.

აღარ გვინდა რია-რია, შემოვძახოთ ტია-ტია,

ვინაიდან ორთა შორის ტია-ტია დიადია.

თორმეტსა და თოთხმეტს შორის,

თორმეტსა და თოთხმეტს შუა -

ჩვენთან იყო იესო და ჩვენთან არის იეშუა.