მანანა ფრუიძე - თვალის უპეში ჩაწოლილო ცრემლის ღრუბელო...

თვალის უპეში ჩაწოლილო ცრემლის ღრუბელო,

ერთი სიტყვაც და გადმოსკდება ცოდვის ნაყოფი,

მოვაფრინდები ამორძალი ულაყს უბელოს

და წავაჩოქებ შენს ფაცხასთან ოფლით გაპოხილს.

გადააფითრებს შიშისაგან მძინარ ლელიანს

ლაგამნაღეჭი ბედაურის ცისფერი ჩრდილი,

შენ შემადარებ სიყვარულის ლამაზ ფერიას

და გაგორდება სოხანეზე სადაფის ღილი.

გაფიცხდებიან ბაგეები ალერსის თქეშში,

დათვრება გრძნობა სურვილით და წითელი ღვინით

და შუაღამის მოსვენებით გარინდულ ტყეში

შენ მოგეცემი ჩემებური ქალური ჟინით.

თვალის უპეში ჩაწოლილო ცრემლის ღრუბელო,

ამიტირდები განშორების სევდიან კართან,

მოვაფრინდები ამორძალი ულაყს უბელოს,

გამოქცეული განთიადზე არტახებს მკლავთა.