ირაკლი აბაშიძე - სიტყვა ეკუთვნის შთამომავლობას, სხვას აღარავის

ქებაც, ვედრებაც, კიცხვაც, მადლობაც,

წყრომაც, ვარამიც -

სიტყვა ეკუთვნის შთამომავლობას,

სხვას აღარავის.

გმობაც, დანდობაც, ლოცვაც, გალობაც,

ქირდვაც მზარავიც -

სიტყვა ეკუთვნის შთამომავლობას,

სხვას აღარავის.

ძეგლად სასახლეც, ოქროს წყალობაც,

ისლის კარავიც -

სიტყვა ეკუთვნის შთამომავლობას,

სხვას აღარავის.

მშვიდად, გულმშვიდად, მტრობაც, წამლობაც,

ღირსიც, არამიც!..

სიტყვა ეკუთვნის შთამომავლობას,

სხვას აღარავის.