ირაკლი კოსტავა - რატომღაც ვიღაც შემყვარებია

გადამტვრეული ლავიწის ძვლები

დაშლილი ძვლები და ფანტაზია,

რატომღაც ვიღაც შემყვარებია

ქუჩაში მოდის და ლამაზია.

ბინძური ქუჩა ხმელი ფოთლებით

ყვითელ გაზეთებს მოაფრენს ქარი,

სუნი აუდის გაჭყლეტილ კატას,

ის კიდევ მოდის ლამაზი ქალი.

მაგრამ ჯერ მოდის, ჯერაც გზაშია

ჯერ არ მოსულა და მალოდინებს,

ცოტაც მოიცათ, ბებიაქალი,

ახალ ღვთისმშობელს მოალოგინებს.

ახალი ღმერთი მოვა დიადი,

და სიყვარულის ააგებს ტაძარს,

ურთიერთობებს გააადვილებს

და თვით არესიც ჩააგებს ხანჯალს.