გივი ალხაზიშვილი - იყო საღამო ჩავლილთა მსგავსი...

იყო საღამო ჩავლილთა მსგავსი,

მზის სუნი ჰქონდა ბალახს მოცელილს,

თითქოსდა ბინდის უვრცესი გარსი

სხვა საღამოთა იყო მომცველი.

იმ შეღამების ნაცნობი ხმები

იმეორებდნენ ძახილს უძველესს,

გვიხმობდნენ ჩვენი წასული ძმები

ჩვენ, ჯერჯერობით გარდაუცვლელებს.

ღმერთო, საღამო წყნარია ისე

და ცის კიდური ისე გახამდა,

რომ ყველა დროის სიჩუმეს ვისმენ,

თითქოს ყველა დღე ერთად დაღამდა.