ომარ გვეტაძე - ვარდები ზამთარში

ეს დილა სიხარულს მპირდება,

ჩავნიშნავ დღეს ხსოვნის დავთარში,

გახედე, ნუ გაგიკვირდება

ვარდები რომ ჰყვავის ზამთარში.

ინახავს ბუნება ქარ-წვიმას

გახვეულს სიცივის კალთაში,

მაგონებს მე თავისგანწირვას

ვარდები გაშლილი ზამთარში.

თაყვანს ვცემთ თითქოსდა ადვილად

ყრმას, მხსნელად გაჩენილს ქართაში,

ბავშვები უფსკრულის ნაპირას -

ვარდები გაშლილი ზამთარში.

რაც უნდა გულრწფელად გიამბო,

ვინ არჩევს დღეს ტყუილს მართალში,

დაღვრილი სისხლივით კიაფობს

ვარდები გაშლილი ზამთარში.

ვთამაშობთ ცხოვრებას და ტკივილს

ვერ ვმალავთ, ვით მახვილს ხალთაში,

როცა ჩანს ღვთისმშობლის ხატივით

ვარდები, გაშლილი ზამთარში.