გელა დაიაური - ცაზე თამაშობენ ვარსკვლავები...

ცაზე თამაშობენ ვარსკვლავები,

როგორც შენს თვალებში ჭინკები,

გვიდგას სიყვარულით, გალაღებით,

გრძნობით ავსებული ჭიქები.

ბახუსს გაუშლია ჭრელი აფრა,

ძმები ღვინოს ვსვამთ და ვღვინდებით,

შემთვრალს უფრო ხშირად, უფრო მძაფრად,

უფრო მენატრები, მინდები.

ჰოი, ეს ეჭვები დამახრჩობენ,

ვინ იცის, სად, ვისთან იქნები...

... ცაზე ვარსკვლავები თამაშობენ,

როგორც შენს თვალებში ჭინკები.