თამაზ ბაძაღუა - ჰამლეტი

სამოთხის წყლიდან გამოპარულა ეს ნაკადული,

გამოჰყოლია მთვარის გრილ წვიმებს

შენს შესახვედრად,

შენს მაცდურ ტბებში ჩასაკარგავად.

როგორ მღერიან ალუბლები შუაღამისას

უხმოდ, უცრემლოთ - სიხარულის წითელ სიმღერებს,

ან ვის რა ესმის - ცარიელი ქვეყნის ბოლოში

გულჩათხრობილი კაცის ნაბიჯის,

ან ზღვის ნაპირას გამორიყული

ჯოჯოხეთის ორი ნიჩბის ხვეწნა მარადი,

ან ვინ შეჰყურებს

რა მდუღარე სისხლი მოწვეთავს

ჩემი სიტყვების გამსკდარ გულიდან.