მაყვალა მრევლიშვილი - მაისის საღამო

შხაპუნა წვიმამ გადიღო,

მიდამოს პირი დაჰბანა,

ხარობს და ყვავის მაისი,

ჩემი სამშობლოს მთა-ბარად.

გახედე, როგორ განათდა,

ზეცაც ზეიმობს ამაღამ;

გამოღმით დასჭექს ქვემეხი,

გაღმით მთა გრგვინავს ამაყად.

მაღლა ღრუბლებში დაფრენენ

სხივები ოქროს ისრებად.

ფერად-ფერადი შუშხუნა

შადრევანივით იშლება.

თითქოს ვარსკვლავებს ფანტავენ

გარს უჩინარი ხელები,

ჩვენს თავზე გზები დახატეს

სინათლის ცისარტყელებით.

სტექს და ჰქუხს ზეცა ფერადი,

ნაპერწკლებს შემოირიგებს,

გინდა ოცნებით თან გაჰყვე

ცაზე გავლებულ ბილიკებს.