გივი ალხაზიშვილი - აქ არავინ შემოივლის...

აქ არავინ შემოივლის,

არც არავის აგონდება,

ბებერ ბაღში ფოთოლცვენის 

მშვიდი ჩამოაკორდება.

გაღებული ზამთრის კარი,

გაფიქრება: მალე მოთოვს,

აქ, ხილული ბგერებივით

ცა ჩამოდის ფოთოლ-ფოთოლ.

მხოლოდ შენ ხარ, სხვა არავინ,

ზეცას მზერით ეწაფები,

დარდი: ცაში გსურდა წასვლა,

ჯერჯერობით ვერ წახვედი.

დაგიღამდა კიდეც სწრაფად,

ვიდრე თვალებს აცეცებდი,

თვალი ისევ აგიცრემლდა

სავსე მთვარის ნამცეცებით.