იოსებ ლონგიშვილი - ახალი წელი მწყემსის ბინაში

როგორც მეცხვარემ თენებისას შავი ნაბადი

დეკემბრის ღამე ცამ ჩამოხსნა ისე მხრებიდან

და მახარობლად სურნელების ტკბილი  ნაკადით

მწყემსის ბინაში ახალი წლის დილა შევიდა.

თოფის გრიალმა ააყეფა დარაჯი ღამის,

ფარეხში ფეხზე წამოიჭრა დედაცხვრის ფარა,

მზემ მარგალიტი დააყარა დათოვლილ ყამირს

და ოქროს ბადე სივრცეს დინჯად გადააფარა.

მორიგე მწყემსმა ცეცხლის პირას გაშალა სუფრა,

სახემღიმარი ვაჟკაცები ჩამოსხდნენ იქვე,

ხუთის მკერდისქვეშ სიხარულის გახშირდა სუნთქვა

და ხუთი ხელი სიყვარულით შეეხო ჭიქებს.

სულს შეუერთდა ახალი წლის სუნთქვა კეთილი,

გული დაიპყრო საოცნებოდ ფანდურის ჟღერამ,

და მეკვლეს კოვზზე დაცემული თაფლი წვეთივით

ჯომარდო მწყემსის ბაგეს მოსწყდა ტკბილი სიმღერა.