რეზო ამაშუკელი - კანტარას ციხე

...კვირაა,

კვიპაროსებზე

კვირიონები სხედან,

კვიპროსზე

იკაროსივით

ვარ კანტარასა ზედან!

იგონებს ციხის ქონგური

შორიდან მოსულ მხედარს:

- ჯაჭვით დაბმული ლომგული

რიჩარდი იხდის მექთანს!..

ასკილი წითლად ღაღანებს

დროით ჩაჟანგულ ბექთან

და სიო დააქანავებს

ველურ ყვავილის ნექტარს...

ახლა, ამ მრუმე ტალანში

სავანელია ბერთა,

- შორს კი მამულის მარანში

ფერი ქორწინობს ფერთან!

და ვხედავ:

ყურძნის ხარდანი

როგორ ანათებს კვეტარს,

წინ უდგას ოქროს შანდალი

აღმაშენებლის ნექტარს!....

კვირაა....

კვიპარისებზე,

კვირიონები სხედან,

კვიპროსზე

იკაროსივით

ვარ კანტარასა ზედან!

ნიქოზიისკენ გაფრინდა,

თვალი ვუწიე ქედანს...

- მიჭირავს ტოტი დაფნის და;

ლურჯად მბჟუტავი სევდა!

პოეზიის გვერდი   • • •     • • •   რეზო ამაშუკელის პოეზია