რეზო ამაშუკელი - მღეროდა ბავშვი

თამადის თხოვნით მღეროდა ბავშვი,

ბავშვი, რომელიც დატოვა მამამ,

მღეროდა ბავშვი და იმის ხმაში

ჩიტივით თრთოდა მწუხარე გამმა.

და ვჭვრეტდი სუფრას არეულს ღვინით

ცოტა ხნის წინათ ზრდილსა და ჭარმაგს,

და წკრიალებდა ბროლივით კრინი

ბავშვის, რომელიც დატოვა მამამ!

დედა კი სხვასთან ცეკვავდა მაშინ

და სხვას ურწევდა ვნებიან ჰამაკს,

- და ყელგაწვდილი მღეროდა ბავშვი,

ბავშვი, რომელიც დატოვა მამამ.

შეწდა სიმღერა და მე ის წვიმა

დამრჩა მარადის უმწარეს წამად...

ხოლო ქეიფი გაგრძელდა ღამით

დახარბებული სმასა და ჭამას...

პოეზიის გვერდი   • • •     • • •   რეზო ამაშუკელის პოეზია