მაყვალა გონაშვილი - მზის იალქნით

მზეს იალქანს გამოვაბამ -

ცისარტყელას იალქანს.

მთვარესა ვთხოვ ვერცხლის გვირგვინს

და სილაღეს - ნიავქარს,

მეგზურობას - ფრთათეთრ პეპლებს,

ფიფქებივით პატარებს...

წამიყვანე, მზის ხომალდო,

ცხრა მთა გადამატარე.

- ამ ხომალდზე ყველას ვიწვევ,

ვინც კი ჩემი ტოლია,

ზევით ცაა, ცა კრიალა,

ქვევით მწვანე მოლია.

ჩვენი დღესასწაულია,

აბა დელი დელია,

გესმით, გესმით, ჩიტუნებიც

მშვიდობაზე მღერიან,

სიკეთეზე მღერიან და

სიყვარულზე მღერიან,

შეხეთ, ზეცა ია-იის,

ია-იის ფერია.

მზის იალქნით დავქრით ცაში,

ქარებს ვეთამაშებით,

გაღიმებულ მზეებს ვხატავთ

მთელი ქვეყნის ბავშვები.