ჯემალ აჯიაშვილი - მორჩა, გადაწყდა ორთაბრძოლა...

მორჩა, გადაწყდა ორთაბრძოლა, - სიტყვა გეძლევა,

გაცხადდა ბოლო არჩევანი, და ხელთათმანი

ჩანს, როგორც შენი ბედისწერის გაუმეცრება, -

და ჭაშნაგირის მოსაკლავად გიხმობს ფატმანი.

გასრულდა შენი უნდობლობა და გაბეზრება,

დაიხშო ბჭე და დაიგმანა ყველა საგმანი

და შესცქერ, - ქვიშის საათიდან როგორ გეცლება

ჟამი - ხელიხელ საგოგმანო და შესახმარი.

გეცლება ჟამი, - ასჯერ ზომე, ასჯერ გასჭერი

და მაინც მსაჯულს დაუბრუნდი, ვით განსასჯელი;

ჩადის, მზე ჩადის, იბჟუტება კანდლის კიანთი,

გიშრის სიშავე ეპარება ძვირფას ყანაოზს,

ხმობს ბედისწერა - განუყრელი დუელიანტი -

და არენაზე სისხლისფერი ლანდი ქანაობს...