ჯემალ აჯიაშვილი - ამერიკელ ინდიელთა მუზეუმში

ბრძენო შამანო, გვიპასუხე, როგორ ბრძანდები,

ანდა ის კაცი, გაგვარკვიე, ვისი კაცია,

მტერს რომ დაუთმო მშობლიური ეკალ-ბარდები

და წყლის ტბორებით დატბორილი რეზერვაცია.

კამკამებს მთვარე სოფლის თავზე - ღმერთის კანდელი, -

გახსოვს იმ კაცმა ლაშქრობისას რა დღე გვაწია? -

სოფლის გადაღმა გადაკარგა ჩვენი ტანდემი

და მეთაურად დაგვისკუპა ვიღაც ცაცია.

აღარც თევზია მდინარეში, აღარც სათევზე,

ხალხი ცოფებს ყრის გადამთიელ არამზადებზე;

შორს კი მთის კიდე იმოსება თეთრი მანდილით

და შემოდგომა - გაზაფხულის ბოლო დარაჯი -

ჩქერს მიუყვება კოვბოური ქამარ-ბანდივით

და იკარგება აქაფებულ ნიაგარაში...