ჯემალ აჯიაშვილი - თვლემს ბედუინი - ოცნებებში ღამის მთეველი

თვლემს ბედუინი - ოცნებებში ღამის მთეველი

და ცერად გასცქერს ვარსკვლავების სიალმაცერეს, -

წლებს გაატანეს მეამბოხე ნაბატეველი

და მიძინებულ ანალებში ხსოვნა ჩაწერეს.

და მეც მათ კვალზე ლეგენდებში ფრთხილად შეველი, -

ცერავს და ცერავს მატიანე ქარვას საცერეს,

სარკინოზებმა გადათქერეს ლურჯი ტყე-ველი

და რაც გადარჩა, ჯვაროსნებმა ხანჯლით დასერეს.

ო, ისტორიის მწველო ქარო, გზავ ოკრო-ბოკროვ,

როგორ ბორგავ და ქრონიკებში როგორ ბობოქრობ;

კუთავს და კუთავს ქარავანი, მგონი, ეფსია,

ტყვე თავდახსნილი ებაზრება ხელბაწრიანებს,

კარვებს აწყდება დასიცხული ეპილეფსია

და ტრამალებზე მუჰამედის ლანდი წრიალებს...