ნიზამი განჯელი - ცხოვრებაში თავს გველივით...

ცხოვრებაში თავს გველივით

ნუ წამოჰყოფ, შენ იცოდე,

თორემ ტალღა თავს წაგაწყვეტს

და კაცი არ შეგიცოდებს!

თუნდ შვიდთავა დევიც იყო,

დიდხანს როდი დაგაცლიან

და ლამაზად შვიდივე თავს

თითო-თითოდ წაგაცლიან.

განა რაა ქედმაღლობა,

რომ იმისთვის გაისარჯო,

ჯერ ამაოდ დაიხარჯო

და მერე კი დაისაჯო?!

ნურც ძალიან იბღინძები,

თორემ გელის მეტი დარდი:

მიწას მწარედ დაასკდები,

თუ მაღლიდან ჩამოვარდი.

თავზე მტვერი დაიყარე,

ნუ აიკელ მთა და ბარი

და იყავი, როგორც მიწა

მდიდარი და თავმდაბალი.