ნიზამი განჯელი - იქნება არც კი იცოდე...

იქნება არც კი იცოდე,

ჩემო დილავ და რიჟრაჟო,

რომ სიტყვის ზვირთებს ვაზვირთებ

და ჩანჩქერივით ვგიჟმაჟობ,

რომ ოქრომჭედელს ვგავარ და

ოქროპირი ვარ თავადა.

ვინც ჩემი ლექსი ისმინა,

ნამეხარივით დავარდა.

თუ გინდა გულით დაიპყრო

ღვთისნიერ კაცთა გულები,

შენი ოქრო და ფულები

უმაქნისია სრულებით.

არ შეიყვარო ოქრო და

არ დაიღუპო თავადა.

ოქრო ზინათად თუ ვარგა,

მოსაკაზმ-მოსართავადა.

ის, ვინც ოქროებს ინახავს,

ვერ მოისვენებს წამითაც,

ფულებზე ვიშით სულს დალევს,

ქურდთაგან შიშის ჭამითა.

ბევრი ფული და ქონება

ბევრი ჯავრი და ჭირია.

ცოტა ქონება იკმარე,

ცოტა წუხილი სჭირია.