ფეროხი - რა კარგია, როცა გიყვარს...

რა კარგია, როცა გიყვარს

და გულს გიძრავს მისი ვნება,

რა კარგია, დედაკაცის

მძიმე დალალებით ება!

რა კარგია, ძმაკაცებში

ფეხის მორთხმა, ნოხის გება,

შეჰყვე სმას და ტკბილზე ტკბილი

ღვინო წრუპო ნება-ნება.

სანამ გიდუღს სიჭაბუკე,

სანამ სისხლი თვისას შვრება,

თორემ, როცა დაბერდები,

შვებაც მშვიდად მოგეშვება.

არ ეგების ჭაბუკისთვის

სიჭაბუკის მუქთად დება,

იმის ქება როგორ ითქმის,

ვინც არ იხდის ტრფობის სნებას!

ბაგე შენი ქალის, ლალის

ბაგეებზე თუ არ დნება,

რაღა შენი ქვეყნად ყოფნა,

რაღა გზაზე ჯირკის გდება!

სიყვარული შვების ტაძარს

აბია და კარგად ება,

მაშ, შეაღე შენც ეს კარი,

მაშ, იგრძენი შენც ეს შვება.