ვახტანგ ხარჩილავა - ქალი ყოველთვის რაღაცას მალავს...

ქალი ყოველთვის რაღაცას მალავს,

ქალს მუდამ რაღაც მოყვება მზითვად,

პირველი კოცნის მხურვალე ალი,

ვნებით ნათქვამი პირველი სიტყვა.

ქალის გაგება ძნელია, ძნელი,

რაღაცას მალავს ყოველთვის ქალი,

დაებინდება ხანდახან მზერა,

და წარსულისკენ გაურბის თვალი...

ქალს მუდამ რაღაც მოყვება მზითვად,

ქალი ყოველთვის რაღაცას მალავს,

ან წიგნში ჩამჭკნარ ყვავილებს მინდვრის,

ან გაყვითლებულ, გაცრეცილ ბარათს...

ქალი ყოველთვის რაღაცას მალავს,

და დარდში გადის ჟამი ზოზინით...

თვითონაც უცხო და შორი მარად,

იდუმალების ბინდით მოსილი...