ჯემალ აჯიაშვილი - სათვლელს ვინ დათვლის...

სათვლელს ვინ დათვლის, დასარიცხავს ვიღა დარიცხავს, -

ძველ სამრეკლოებს ეხეთქება ზარი ნარისხი,

ისევ შერისხავს შემრისხავი ნაცნობ სარისხავს

და ჩვეულ საგნებს ენიჭება სულ სხვა ხარისხი.

ისევ გაუტევს ჩვენი მნათე, ისევ გარისკავს, -

ახლაც შენთან ვარ, ჩემო კარგო, მოდი, დამისხი! -

ისევ უწამლებს დედაბერი დაჭრილ ჯარისკაცს

და ნაცნობ სერებს მოიკითხავს ბრბო გულმავიწყი.

სოფლის ბორანი საბორნეში ისევ იბორნებს

და მარეკებიც აისხავენ ძველ უნიფორმებს;

ბრუნავს სამყარო - ვის რას ეტყვის, სად რას ინებებს? -

მთვარეს შეჰყმუის ქვესკნელიდან ვიღაც მყეფარი,

ცა კი კვლავ გზავნის გამუდმებულ შეტყობინებებს

და ქვეყნის მაჯას აკვირდება, ვით შემტყვებარი...