მურმან ლებანიძე - ავტობუსში

სომეხი

ქართველს უამბობდა, პიტალო სახით

უსმენდათ ფრანგი,

ამრეზილი წვრილ-წვრილი ხალხით...

„რა ვიხარეო, -

თქვა სომეხმა, - რაფრად დანაყა,

რა ჩხუბს ვუყურე,

ერთმა კაცმა ოთხი გალახა,

რომელსაც მოსდო,

სათითაოდ ადგილზე დასვა,

მიაწყ-მოაწყო

და თავის გზით გასწია კაცმა...“

„ვენაცვალეო

შიგ ჯიგარში! - (სომეხი იდგა)

სად უყურეო,

თუ კაცი ხარ?!“ - ქართველმა ჰკითხა.

ფრანგს გაეცინა:

„რა ხალხია, ეს რაებს ბლანდავს!

არ კითხულობსო

დალოცვილი მტყუანს და მართალს!“

„ამას უყურე! -

თქვა სომეხმა, - რა ბრძანეთ აქო!

ვაჟკაცობისა

რა გესმისო, შე მართლა ფრანგო!“

და თქვა ქართველმაც

იდეური თანხმობით დოსტთან:

„ერთი - ყოველთვის მართალია

ათთან და ოცთან!“

„ცოტანი ხართო!

ვერ გასულხართ, ვერც გახვალთ გაღმა! -

რიცხობრიობის

გაწუხებთო საკითხი!“ -

ფრანგმა.