მურმან ლებანიძე - პუშკინმა სკვერი აირჩია...

პუშკინმა სკვერი აირჩია,

ლერმონტოვს ჰკლავენ ტრამალში,

სიკვდილისაკენ გასწია

ლორდ ბაირონმა ლამანშით.

პეტეფიც მაგათ მხარშია,

ისიც ქარშია ფრთამალში,

გვწამს ფედერიკო გარსია -

უხორცოსავით მამაცი!

ვთქვათ, ტრაგედია არც კია:

თავგაყოფილი დრამაში,

ვახსენოთ, ხარჯი ხარჯია,

ესენინ, ბიჭი ლამაზი!

პოეტი - სხვაგან ასია,

საქართველოში სამასი,

გალაკტიონი თავშია,

რაღა თქმა უნდა, ამაშიც...

დიდი პოეტი მსგავსია

და ყველა ერთი მთავარში:

სუყველა დიდი ბავშვია,

უყვარს სიკვდილთან თამაში!