ტარიელ ჭანტურია - უძინარი ლექსი

ხელში ჩავიგდე სიჩუმე

ძლივს. ბოლოს, როგორც იქნა...

არ გინდა? - იქცე სიჩუმედ -

უმშვენიერეს წიგნად...

აღარც ყაყანი, ბუზღუნი,

ჩურჩული, ლანძღვა, ლიქნა...

ჩამოდგა დიდი სიჩუმე,

ძლივს. ბოლოს, როგორც იქნა...

რაც მე იმ მღვრიე ცხოვრებამ

და იმ ხმაურმა მიქნა!

გამეფდა დიდი სიჩუმე!

ძლივს. ბოლოს. როგორც იქნა...

აღარც ის კატა მიკნავის,

აღარ მიკნავის, მიკნა...

მთლად სიკვდილივით სიჩუმე

ჩამოდგა, როგორც იქნა...

დუმს თხა, პოეტის საფლავზე

ბალახები რო კიკნა...

მარადიული სიჩუმე.

ძლივს. ბოლოს, როგორც იქნა...