გალაკტიონ ტაბიძე - მზის ამოსვლა ზღვაზე

დააყირავა მზემ ვარდებით სავსე კალათა,

სავსე კალათა ცის ფერებით, ლურჯით, თეთრებით..

გქონდეს სახსოვრად უეცარი ნახვის ბალადა,

ნაზი ბალადა იმედებით და შეხვედრებით...

კვლავ გამოცოცხლდა ია-ვარდი ოცნების ნავზე, 

ოცნების ნავზე სიხარული დაჰქრის ვედრებით,

და აღტაცებით შეიმოსა ბუნება სავსე -

ბუნება, სავსე იმედებით და შეხვედრებით.

და ჩემთვის გათბა ყველაფერი... აჰა, საცაა,

აჰა, საცაა აიწევა ხმა გამკვეთრებით -

მზის ამოსვლისებრ - მოგონებაც მარადი გზაა,

მარადი გზაა იმედების და შეხვედრების.

დაიძრა გემი ნავთსადგურით, მგზავრებით სავსე,

ხომალდი სავსე მეზღვაურით, ჩვენი მხედრებით.

მას სხვა ხომალდი უერთდება საბრძოლო გზაზე -

საბრძოლო გზაზე იმედებით და შეხვედრებით.