ედუარდ უგულავა - გილოცავ!

შენ იმედს ყოფნი სახელად,

ქოჩორს მზის სხივი გიმოსავს.

გილოცავ თვალის გახელას,

პირველ შეკრთომას გილოცავ!

გილოცავ მიწას სალოცავს,

პირზე ღიმილის მოფენას,

პირველი სიტყვის წარმოთქმას,

პირველი მერცხლის მოფრენას.

ამ მზეს და ამ გრილ სიოსაც,

ამ მთებს და ამ ცას კრიალას.

გაჩენილ ფიქრებს გილოცავ

და ბევრ გასაჩენ იარას.

ამ სოფლის ტყუილ-მართალსაც,

განაგონსაც და ნახულსაც,

შემოდგომას და ზამთარსაც,

გაზაფხულსაც და ზაფხულსაც.

და თუმცა ბოლო არ უჩანს

გზებს უძნელესს და იოლსაც,

გილოცავ უფლის საჩუქარს,

ქვენად გაჩენას გილოცავ!