თედო ბექიშვილი - გადავაფაროთ საკუთარ ტკივილს...

მოდი, ჩვენც იმათ ნუ მივეთვლებით,

ვისაც აქამდის ბედი არ სწყალობს,

ვისაც გზად შეხვდა მეტი ეკლები -

ჩვენ, მოდი, გლოვა მათ დავაცალოთ.

მათ, ვინაც ჩვენზე მეტი ეწამა,

ვინც ბედმა უფრო მწარედ გასწირა,

ვის ტკივილებსაც აღარ ეწამლა,

ვინც ჩვენზე ცოდვა არის ასწილად.

მოდი, ჩვენ მათი ხათრით და რიდით,

ნუ ვიხმამაღლებთ, მწყევარნი ბედის.

გლოვის გამართვა ცოდვაა დიდი,

შენზე მწუხარეს თუ ხედავ გვერდით.

რა ვუყოთ, თუკი ვერ შევესწარით

ბედნიერების ხმამაღალ ყივილს...

მო, მოთმინების თეთრი ზეწარი

გადავაფაროთ საკუთარ ტკივილს.