ჯემალ ქათამაძე - ციხისძირი

ლურჯ კაბაში ციხისძირი

ალაგ მწვანე, წითელია

და ბებერი ციხის ძირი

ფეხშიშველა მითელია.

მიმოზებთან მიცინია,

ფორთოხლები მირხევია

ბალახებზე მიძინია,

ღამე თეთრად მითევია.

და ის გოგო თვალხატულა

ახლაც ყველას მირჩევნია.

არ ვიცი სად გაპარულა,

სულში ცეცხლის ჩინჩხლებია.

აქ გაფრინდა ჩემი ყრმობა

ბავშვობა და შოშიობა,

პეპლობა და ყვავილობა,

ზღვასავით რომ მოშხიოდა.

რაღა ვუყო ამ ჭაღარას,

ოცნებები ინთქმებიან

და ბებერი პეტრას ციხე

ასე ვეღარ მითელია...

დრო სად იყო უქმად დგომის,

სიმღერებად დავწვი სული.

სიო დაქრის შემოდგომის

და ძირს უთხრის ყველა სურვილს.

სიბერეს და სიკვდილს შუა

ვდგავარ, როგორც კლდეზე მუხა.

შავთვალებამ მომატყუა,

სიყვარულზე ამად ვქუხვარ.

თუ ვინმემ თქვას მასზე ძვირი

გულში სევდად მიმრჩენია.

ვმღერი: ჩემი ციხისძირი

ყველა ბაღდადს მირჩევნია.