ჯემალ ქათამაძე - მოვედი. ღირდა თუ არა?..

მოვედი. ღირდა თუ არა?

წავალ, რას ვტოვებ სოფლად?

მზემ ქედებს გადაუარა

და ღამემ ზღვასთან მოკლა.

მეც წავალ ასე უჩუმრად,

ცას შევადნები ფიფქად,

წუთისოფელის ჩურჩულმა

მეტი რა უნდა მიქნას.

რატომ ავიკლო ქვეყანა,

რატომ ვაწამო მოძმე,

არ ვიყავ, ბინდი მეფარა,

მოველ და... უნდა მოვკვდე.

დავდივარ ჩემთვის გულმშვიდად,

წუხილს არ ვიმჩნევ დაღად.

ზოგს ბოროტება უშლიდა

ქვეყნად ეცხოვრა ლაღად.

ზოგმა დუნია ინდომა,

სხვისი ზღვები და ზვრები,

მე ვდგავარ მწვან მინდორთან

და მხიარულად ვკვდები.